中環出更：陳仲尼睇波悟人生道理
匯聚城中才俊嘅香港青年聯會尋日換屆，逾百會員齊集召開會員大會，選出新一屆常董會成員。陳仲尼（Rock）高票連任香港青聯主席，常務副主席葉振都與其餘七位副主席包括朱鼎健（Ken）、霍啟剛、鄭志剛、秦善文、林亨利、李永康、吳小莉亦蟬聯成功，「咭片皇」創辦人鄭重科就新加入做副主席。許晉亨外甥郭永亮（Andy）「升呢」做副秘書長；霍家第三代接班人霍啟山以及Neway太子爺薛嘉麟都升咗級，擔任常董。
香港青聯陽剛氣十足，男多女少，聚首一堂難免講起城中熱話世界盃。霍啟山係超級英格蘭迷，佢對隊波今屆表現大失所望，但依然支持到底，已買定機票飛去南非睇淘汰賽及決賽，哥哥霍啟剛就擔心南非治安麻麻，寧願留港觀戰，啟剛仲物色緊地方睇決賽，皆因留喺家中睇波太悶，集齊班老友又嗌又叫，氣氛熱鬧好多。
冧莊青聯主席
阿Rock都係球迷，卓妮請佢貼最後兩強，佢係穩陣派，話言之過早，皆因阿根廷表現神勇，巴西隊亦發力當中。咁決賽去邊度睇好？阿Rock一早諗咗搵「兄弟」薛嘉麟幫手，開定一間可容納百人嘅卡拉OK大房。
阿Rock睇波都悟出人生道理，佢話青聯好比一隊球隊，成功全靠兄弟同心：「你睇法國球隊發生內鬥就輸波！」所以佢好感謝過去一年兄弟姊妹嘅支持，嚟緊一年會加強青年工作，幫年輕人搞好「三個業」，就係學業、就業同創業。
講起阿根廷，原來Andy郭永亮都係擁躉。全城熱講世界盃，但Ken朱就話興趣不大，反而一講起打高球，就成個生猛晒。
前香港青聯主席黃英豪、曾智雄、許華傑尋晚都嚟撐場，黃英豪更以「自強不息」勉勵後輩。卓妮轉頭捉住「天匯神秘買家」秦善文。秦善文換咗新髮型，眼鏡都換埋。講起天匯風波，佢承認交易最終冇完成，原因就唔講嘞，總之係公平交易喎。同場仲有詹培忠嘅公子詹劍崙，佢話有意加入青聯，所以嚟「探路」。
卓妮