政情：肥胡出街怕撞正遊行

肥胡承認有啲擔心香港嘅街頭抗爭持續下去，將影響營商環境。佢話喺香港住咗幾十年，都未見過今時今日咁多激進聲音，好似郁親就話包圍立法會。佢希望大家用平和、理性嘅手法表達意見，唔好搞到引起流血事件。

講到總商會工作，佢一上任就有個「定時炸彈」迎接佢。大家咪誤會！講嘅係總商會大門口擺咗個大型倒數鐘，迎接佢哋成立一百五十周年，尋日個鐘顯示仲有三百四十一日。我哋問肥胡倒數完畢嗰刻會有咩搞作？點知佢故作神秘笑謂：「到時話畀你知！」