政情：容永祺畀煲呔曾搶客

政治一日都嫌長，近日政改發展更係峰迴路轉。聽日終於到達表決嘅關鍵時刻，尋日全國政協委員兼香港專業及資深行政人員協會創會會長容永祺（Samuel），特登約班記者出嚟飯敍，分享佢對政改嘅意見。殊不知煲呔曾尋日朝早突然公布中午開記招，搞到原本應承咗出席嘅記者迫不得已「放飛機」，最後得番小貓三四隻。畀煲呔曾撬人，Samuel笑笑口話政改大事臨近，畀佢搶晒風頭一啲都唔介意喎。

Samuel話好開心中央同港府肯作出咁大讓步，接納區議會方案，令今次政改有望通過。佢仲大讚民主黨主席鐵頭仁有咁大勇氣行呢一步添。

講完政改講世博。Samuel話世博開幕個幾月，自己已去咗三次。第一次同專資會去，第二次跟政協去，第三次就親自帶班保險業界精英遊世博，帶隊出發前，Samuel寄晒信畀有關單位，最後獲VIP禮遇，一團人唔使一個上午就行咗兩岸四地展館，其他要同人迫嘅遊客恨都恨唔到！