政情：余錦基幫英軍「解圍」
唔知係咪支南非打氣喇叭vuvuzela聲音澎湃得滯，搞到今屆世界盃唔少強隊喺球場上嘅表現差強人意。尋日香港足總董事余錦基出席公益金一個頒獎禮時話，稍後會過南非睇十六強，最希望決賽係巴西對西班牙。
基哥係英格蘭捧場客，但佢都唔爭愛隊，話今年歐洲球隊表現好差，個個踢得好錫身，朗尼仔直情踢到散晒，反而未出名嘅G仔仲有睇頭，不過佢都幫愛隊講番句公道話。基哥話歐洲足球賽接二連三，今次佢哋表現唔好，唔係完全無道理，加上佢哋真係踢得麻麻，入到圍嘅機會好微。
施榮懷話屋企勝現場
同場嘅廠商會副會長施榮懷去完瑞士日內瓦開會返嚟，本身係足球迷嘅佢，當然唔會錯過賽事啦！不過佢都認同今屆賽事令人好失望，好似有晚佢睇科特迪瓦對葡萄牙，兩隊都好似水兵鬥海軍咁，睇到佢好勞氣。不過始終都係四年一度盛事，佢都會繼續追，但就唔會過南非睇，事關佢上屆都有去韓國睇，氣氛雖好，但坐定定喺個位度，唔及喺屋企可以多角度欣賞球員表演。