政情：富豪科水三千萬撐友協
由全國政協常委陳永棋揸旗嘅「香港友好協進會」上周四喺會展筵開一百一十席，慶祝成立二十一周年晚宴。棋哥喺政商界人脈廣，城中大孖沙畀面到賀，更喺背後「發功」，為「友協」籌得三千萬經費。
呢筆錢對「友協」意義重大，事關去年遇着金融海嘯，撲水有難度，「友協」去年籌款經費唔夠一千萬，搞到晚宴要揼富豪心口，搵嚟全國政協常委鄭家純同洪祖杭贊助。
陳永棋功不可沒
今年經濟好轉，富豪荷包脹卜卜，即時「科水」表心意。「友協」會長陳永棋帶頭捐五百萬元；信和置業主席黃志祥亦拍住上，豪捐五百萬元；「零食大王」戴德豐、玩具大王蔡志明及洪祖杭各捐三百萬元；福建幫頭領盧文端捐二百萬元。至於「深圳王」黃楚標都唔輸蝕，捐五十萬元，加埋其他善長，合共籌得三千萬元。所以上周四晚宴逾百萬元開支，全部由「友協」支付。棋哥喺逆市力挽狂瀾，功不可沒也！
工作咁忙，棋哥早前去倫敦度假兩星期充電。佢笑言此行做咗囡囡管家，每日接孫女返幼兒班，又幫囡囡買餸，跟住做埋司機送孫女參加課外活動，雖然忙，但諗起都心甜喎。