政情：籌款勁跌公民黨淪丐幫

有公民黨成員透露，公民黨搞「五區公投」蝕晒章，何止碰得焦頭爛額，簡直係嚴重內傷！該名黨員話，公民黨特別會員大會表決參與五區公投，支持與反對嘅比例為九對一，於是高層大條道理推行公投運動，但實情係，黨內好多人心中有數，反對公投嘅黨員絕非少數，只係表決當日無現身。而黨員同支持者對公民黨高層嘅失望之情，就喺今年嘅年度籌款中反映晒出嚟。

往年公民黨對外籌款，都維持喺一百萬元嘅水位，好似○九年，就籌到一百三十萬元，但今年三月底嘅大型電影籌款，撞啱公民黨公布夥拍社民連發動「五區公投」之後，籌款數字直線下滑，跌到得番二十萬元。事實擺在眼前，大量「有米」支持者因不滿「公投」而離棄公民黨。

十月改選或現退黨潮

仲有，「五區公投」之後，政界一直有傳公民黨出現退黨潮，但公民黨高層一直對外宣稱黨員人數無大變化。呢句話半真半假啦，數目係就係差唔多，但黨內嘅人就知道，傳聞無花假，有唔少中產同專業嘅傳統支持者紛紛求去，動搖根基，換嚟嘅係一啲「一窮二白」、意識形態激進嘅後生仔加入，一減一加，玩數字遊戲，黨員人數確係保得住，但黨員素質就天淵之別；再咁落去，公民黨遲早變社民連「第二」。

早前有「一個多年來與公民黨風雨同路的人」喺多份報章登廣告，批評公民黨高層喺五區公投失敗後嘅閃縮表現，初時黨內高層質疑，都唔知係咪民建聯喺度搞事，但後來呢位風雨同路人再登廣告，列出自己同公民黨有關係嘅證據，公民黨內好多人都知呢位仁兄確有其人，而且仲係一直喺財力上大力支持公民黨嘅大水喉，大家嗰時先至知大鑊。

公民黨內風雨飄搖，敲定暑假搞路向營，為十月中委會改選籌備之餘，吸納黨內諍言。不過，消息指，黨內現有一批人離心好大，甚至想轉投民主黨，只係政改大戰風頭火勢，暫按兵不動，到十月中委會改選，或會出現巨大退黨潮，剩低嘅就係激進分子，走社民連舊路。