中環耳目：KK慳家can.teen買飯盒醫肚
百物騰貴，喺寸金尺土嘅中環食飯，閒閒哋要五、六十元。工聯會立法會議員黃國健（KK）搞工會出身，一向知慳識儉，後生時行過船做過海員嘅KK，平日愛以菜脯送粥，遇上立法會開會嘅日子，寧願啃飯盒。
「今日叫豐富㗎喇！」
上星期四中午十二點幾，卓妮貢去中環搵老友開餐，行經太子大廈閣樓間can.teen快餐店，見到KK喺人堆中排隊買飯盒。撞正食lunch時間，人龍打晒蛇餅，KK一個箭步排喺隊尾，雙手插住褲袋，抬頭研究吓水牌上列出嘅菜式。等咗十幾分鐘，終於輪到佢，KK柯打一個滑蛋飯，埋單盛惠四十元。
卓妮問佢做乜咁慘捱飯盒，KK笑住擰頭：「今日叫豐富㗎喇！」佢扁嘴話，中環生活指數高，係咁意買個滑蛋飯，唔連飲品都要四十元，認真乸脷！
KK有個慳錢心得，撞啱時間充裕，會行上中環政府總部嘅餐廳買飯食，事關嗰度中午飯盒只賣三十二至三十五元，仲包埋例湯或者熱飲，計落抵好多。可惜有時立法會會議開不停，為咗貪方便，畀貴啲都要行去最近嘅can.teen開餐。
can.teen係美心集團旗下嘅食肆，中午飯有燒味，亦有家常小菜飯盒，因為快速方便，除吸引上班族外，唔少高官名人都係can.teen常客。