中環出更（二）：朱鼎健綠色生活 減輕近視

籌備海口度假區開幕

阿Ken一星期有六日喺高球場度過，每日望住一片片綠色波地，視野一望無際，原本有三百度近視嘅阿Ken最近發現得番百幾度，認真羨煞旁人！

不過羨慕人哋就不如做好自己，依家觀瀾湖球會除咗深圳同東莞之外，位於海口市嘅最新海南觀瀾湖度假區，嚟緊十月將會正式開幕，想好似Ken咁減近視嘅話，都不妨多啲去海口打波。

Ken為咗呢個新baby，呢幾年密密飛海口，佢笑言連皮膚都黑埋，不過辛苦都係值得嘅，事關呢個新高球勝地，除咗規劃咗十個場之外，仲會係一個國際級resort，僅五星級酒店房間就有五百二十五間，仲有十二間餐廳、室內外泳池、人造沙灘、spa水療等等。難怪依家只係啟用咗六個場，就已經吸引咗大批「三北」客去打波。

阿Ken話，深圳同東莞嘅觀瀾湖深得珠三角一帶嘅高球fans支持，海口市嘅球場就以河北、北京、東北嘅客人為多，僅員工人數就有二千幾個，雖然唔及深、東嘅過萬員工，但服務質素絕對係國際級。阿Ken仲親自做QC，唔會顧此失彼，一星期三日留喺深圳同東莞，三日就飛去海口，聲音兩邊走，事事親力親為，不過佢話體力上完全無問題。