中環出更（一）：張怡寧偕夫撐媒人李寧
「乒壇一姐」張怡寧去年同金融界巨子徐威結婚後，至今仍然放緊悠長婚假。有傳定居香港嘅佢渴望做媽媽，但張怡寧始終不露半點口風，更將另一半保護得密密實實。早前「紅娘」兼前體操王子李寧獲頒科大榮譽院士，呢對低調新人再度亮相。
嫁得有情郎嘅張怡寧，面上散發幸福少奶奶嘅笑容。卓妮見佢身形依然纖瘦如昔，未見懷孕迹象。着慣運動服嘅張怡寧呢日穿上白色花邊外套，內襯粉紅色T恤，少了一份拚勁，多咗一份溫婉。
全身名牌夠品味
睇真啲，張怡寧手挽新款Prada紅色手袋，手戴百達翡麗4959G型號鑲鑽名錶，隻錶光芒四射，售價約十八萬六千元，可見嫁得有錢人嘅張怡寧，開始注重生活品味。卓妮更留意到，外表冷酷嘅佢亦有貪靚一面，迷上女士最愛嘅gel甲玩意，喺指甲畫上花紋，流露可愛一面。
徐威對新婚太太非常細心，陪佢坐足全程。香港人對徐威或者感到陌生，據聞佢來頭唔嘢小，係金融界人士，身家同「跳水王后」伏明霞老公梁錦松不相伯仲，最重要係，佢同張怡寧夾到極，同樣熱愛乒乓波。
何解張怡寧專登要拖埋老公嚟捧場？原來李寧就係張怡寧同徐威之間嘅「紅娘」，徐威透過李寧認識心中嘅女神。「紅娘」攞獎，試問兩人又點可以唔畀面呢？