煲呔曾日夜掛住為政制改革起錨、超錯、拋錨，佢幾咁閒，騷做完，辯論由頭輸到尾，有乜所謂，學精少少，壓住唔畀塊面「獨自怎生得黑」，自嘲幾句又放浪江湖，一簑煙雨任平生，總之，「我盡咗力喇！」
煲呔曾及其三司十二局，日日瞎起錨，至於民生多艱，則完全睇唔到，好似失業率又惡化，當中十五至二十四歲青少年的失業率更上升零點九個百分點，升至百分之十一點一。失業率回升，未來只會更惡化，皆因政府保就業廢噏，暑假後當大批畢業生將投入市場，失業率肯定進一步上升。有議員批評：政府乜都唔理，淨係掛住推政改，將民生放埋一邊。
有關批評，叫老朽想起一個外科醫生的笑話。一個人中箭，找醫生治傷，醫生拿起剪子把箭剪斷，中箭者不解。醫生說：我是外科醫生，只管外面的事，拔箭頭是內科醫生的事。現在的問題是：政府部門各自為政，社會出現問題，大家睇到眼火爆，一個部門推一個部門，政出多門，狂嘥公帑到頭來卻冇人負責。
如今，高官掛住瞎起錨，休漁期又起錨！扒龍舟又起錨！百姓則是中箭的人多，拔箭的人少，何況又只拔一半。獅子山下，以前是歡笑多於唏噓，目前卻是哀痛多於歡笑，皆因政府胡亂起錨，換來同舟人齊反艇。所以話有陣時要睇形勢，唔好明知孱仔、奀挑鬼命一個，搵個無敵女金剛來隻揪，結果反肚擂台，丟人現眼！
政制風雨飄搖，與其瞎起錨，不如摸着石頭過河，起碼不怕反艇，在怒海狂濤叫人睇見牙煙。民間百姓，中箭不拔，都成了刺蝟，政府拍手：香港原來多野味！