政情：梁美芬訪滬學術交流

梁美芬當年喺中大讀咗五年，其中三年分別去咗美國、法國同北京交流，深深領會到讀萬卷書不如行萬里路嘅道理。後來佢做咗教授，都好鍾意帶啲學生外出交流，等佢哋可以擁有同自己一樣嘅體驗同經歷。

不過唔講唔知，梁美芬對上嗰次帶團已經係上個世紀嘅事，當年跟佢啲學生，好多已經做咗律師、有啲仲做埋法官。依家事隔十六年再度帶團，佢好希望可以透過三日朝夕相對，同呢廿幾個學生有多啲深入交流，親身了解依家啲八、九十後嘅想法，以及讓對方可以理性認知、感性認識祖國嘅文化同發展。

雖然今次交流團只有三日，但梁美芬都希望可以抽到時間去上海世博行個圈，彌補上次立法會世博團走馬看花嘅損失。