政情：葉偉明唔得閒「造人」

葉偉明雖然結咗婚只有短短三年，但都好想快啲下年父親節就有個ＢＢ陪佢慶祝，不過最近佢為政改同最低工資立法等工作忙到飛起，連「造人」都無時間。好似尋日咁，佢朝早返完立法會開會傾最低工資，跟手就要飛過嚟上水出席活動，然後又再撲返過海為撐政改遊行做準備，搞到連陪太太嘅時間都好少，好彩太太唔介意。

葉偉明喺活動上即席表演煎太陽蛋，揸起鑊鏟上嚟有板有眼。佢話自己最拿手係煲湯同蒸肉餅畀太太食，不過對上嗰次落廚煮飯都已經係三個星期前嘅事，再次證明佢真係好忙。希望立法會暑假休咗會之後，葉議員可以「造人」成功啦！