政情：老虎仔洩國家機密？
普選聯昨早開會討論係咪支持民主黨嘅區議會方案，會後記者喺中環太子大廈一樓嘅「can．teen」餐廳巧遇民協主席廖成利（老虎仔）同另外兩個普選聯成員食午飯。老虎仔歎完個海南雞飯後，就攞起部BlackBerry㩒吓㩒吓，期間收到個短訊，通知佢中央已經接納咗民主黨嘅方案喇！
老虎仔身為同中央談判溝通嘅其中一方，就算收到風聲，理應絕密處理，靜候中央或港府作出官方公布，偏偏佢就毫無避忌向記者展示呢個國家機密，之後又喺下午嘅普選聯記者會上再次公開展示。短訊內容話：「Dear Bruce（廖成利英文名），剛得悉北京已接受民主黨方案，今次政改，能與你等並肩作戰，戰至最後一兵一卒，幸甚！爭取極終（終極）普選，未來仍需努力！××拜謝！」
其實立法會表決政改嘅時間，老虎仔都好似未卜先知咁，早喺四月中已預測政改會喺六月廿三日進行表決，當時距離立法會五區補選仲有成個月時間，乜嘢都可以發生，莫非老虎仔嘅收風能力真係咁強？