政情：手足作詩餞別陳南祿
喺太古系任職長達三十三年嘅陳南祿（Philip），下個月就會正式過檔恒隆履新。佢近日忙住同各位太古系舊戰友食餞別宴，早幾晚就輪到同國泰嘅高級經理食飯，由現任國泰行政總裁湯彥麟親自做東，認真畀面。
國泰啲高級經理經常要周圍飛，要集齊佢哋食呢餐飯絕對唔容易，所以佢哋就趁住每三個月一次嘅高級經理聚會順便搞埋，咁就連駐守海外嘅同事，都可以返嚟齊齊整整食飯，最後足足要擺成十一圍先坐得晒，陣容鼎盛！須知太古系人多勢眾，今次只係國泰其中一個職級而已，其他部門同職級嘅員工，仲陸續排住隊請Philip食飯，睇怕佢都要諗定計減肥先掂。
「祝陳南祿健康快樂」
Philip有個外號叫做「美心姑爺」，呢餐餞別宴就選擇咗喺美心集團旗下、曾獲米之蓮推介嘅洞庭樓度搞。Philip仲特別揀咗每席盛惠四千二百蚊、名為「良朋歡聚宴」嘅套餐，別有象徵意義。除咗食飯敍舊之外，班舊同事仲攞咗好多Philip喺國泰任職時嘅舊相出嚟，畀大家懷緬吓昔日工作點滴。有同事更為佢作咗首七言詩，八句詩嘅頭一個字串埋就係「祝陳南祿健康快樂」，入面仲嵌入咗「美心」、「太古」、「國泰」、「港龍」、「海洋」、「快馬」同「恒隆」等Philip過往任職過同即將轉投嘅公司名，相當有心思。
為咗支持生態保育，國泰近年嚟嘅公司飯局，都唔會有魚翅食，呢餐當然亦唔例外，所以佢哋特別將套餐原有嘅「金華芙蓉干貝煨魚翅」，改咗做「蟲草花竹節雞盅」，令Philip食得安心，唔怕畀啲保育團體抽秤。