政情：煲呔曾唱獨腳戲補飛

煲呔曾尋日喺facebook上載咗一條兩分幾鐘長、題為「為香港起錨 支持2012政制方案」嘅短片。大家起初以為佢又想做人肉錄音機，再次重複啲早已講到爛嘅論點硬銷政改，點知聽落就知有玄機，原來佢係想借條短片補飛反擊Audrey，喺無現場對手同直播壓力下，解答番幾條佢喺辯論中答唔到嘅尖銳問題。

拍短片都要睇貓紙？

例如煲呔曾喺片中表示，近來好多人問佢，究竟起錨之後會駛去邊㗎？然後又自問自答咁話，其實佢係想帶領大家前往人大常委會訂下嘅二○一七同二○二○年雙普選目標。

煲呔曾之後又話，仲有人問佢如果最終落實唔到普選，佢會唔會好似啲欠交功課嘅學生一樣畀老師罰㗎？佢重申自己已經好努力咁為港人爭取咗普選時間表，人大常委會嘅決定有法律效力，所以承諾係會兌現嘅。咪係囉！咁簡單易明嘅答案，點解佢喺辯論時會噏唔出㗎呢？唔通佢淨係識得賊過興兵、喺網上上演獨腳騷對住空氣辯論？

煲呔曾早前喺facebook上載短片為「起錨爛騷」自辯，被揭發喺短短一分鐘讀白中，低頭偷睇咗六次貓紙。今次套短片佢再冇不斷低頭，但亦唔似係專心對住個鏡頭講嘢，反而好似望緊由助手喺鏡頭後面舉起嘅人肉貓紙。如果真係連事後補飛都要人提水，煲呔曾好心請你早抖喇！