中環出更：杜振源款客品嘗Henri Jayer紅酒
保良局總理、外號「快勞夾（file）大王」嘅國際文具集團主席兼行政總裁杜振源（Simon）向來作風低調，但背後其實係個好識得享受生活。卓妮有晚去咗尖沙咀半島酒店食晚飯，咁啱遇到Simon同太太、愛兒杜擴業（Michael）到法國餐廳Gaddi's晚宴，原來係為咗慶祝佢匹愛駒「按得快」早前贏頭馬，並為未來新抱Vivian慶祝生日。
當晚Simon請來前經濟發展及勞工局局長葉澍堃（Stephen）一家四口作客。Simon自備咗五支靚葡萄酒，其中三支係透過拍賣投得、由「布根地酒神」Henri Jayer主理嘅頂級法國紅酒，包括1990年Vosne Romanee Cros-Parantoux、1978年Echezeaux及1988年Vosne-Romanee，總值十多萬元，仲有兩支係1990年Montrachet及1988年Meursault白酒，另外再即場柯打多一支Krug香檳慶祝。
Simon挑選嘅菜式以清淡為主，包括香煎特大日本元貝、焗淡水小龍蝦、橄欖油低溫煮三文魚配黑魚子醬及檸檬蛋黃汁、燒西西里紅蝦配扁意大利粉、烤法國小羊腿配慢煮薯仔、龍脷魚鮮蟹肉及龍蝦雲吞等。甜品就有極品朱古力夾層餅配拖菲及甘味焦糖、法式小甜點等。
豐富晚餐勾起創業回憶
值得一提嘅係烤法國小羊腿更大有來頭，羊仔髀選自法國比利牛斯山脈，一出世開始飲奶，養至四十三日即屠宰，再急凍運送到港，肉質相當嫩滑，但要喺三星期前預訂。咁精彩嘅佳餚，全部由餐廳主廚David Goodridge（葛偉迪）親自主理，當晚仲現身獻技切羊仔髀。
Simon成功絕非僥倖，呢頓豐富晚餐就令佢想起當年嘅刻薄老闆。當年佢喺一間公司做廠長，年尾伙記等出雙糧，但老闆一味拖。到最後一日，佢硬着頭皮入房同老闆爭取，最後老闆終於肯出雙糧，但全公司唯獨Simon同佢助理無份，無癮之下劈炮唔撈自行創業，經營至今做出驕人成績，坐擁全球五成快勞夾生意，成為跨國企業。
咁成功咪要多謝以前個老闆？Simon就話：「都係㗎，有次喺馬場遇到以前個老闆，都有上前握手多謝佢！」Simon依家賺到錢都希望回饋社會，稍後會支持Stephen有份幫手嘅「小母牛」活動。
卓妮