政情：五散人訂房睇波避包圍
立法會下星期三表決政改方案，建制陣營依家除咗考慮方案最終是否通過之外，參考高鐵撥款後立法會大樓被包圍嘅經驗，仲擔心一旦表決後，可以點樣避開示威人潮。上次以游擊戰術成功安全撤退嘅「五散人」，今次又諗到好橋，佢哋索性喺立法會book定間房，諗住就算被困立法會都可以五兄弟一齊睇世界盃！
五散之子嘅ＩＴ界代表譚偉豪（Samson）同我哋講，已通知其他四散，即廠商會林大輝、會計界陳茂波、保險界陳健波同醫學界梁家騮，喺廿三日政改表決當晚共同進退。
Samson已經考慮晒所有可能狀況，如果當晚十點前未能投票，就一齊前後腳走先，避免完會時示威者起哄包圍立法會時走唔甩。如果表決咗，無論方案過唔過，都一定無辦法走，所以五散人已經合作輪住book房，由當晚十點book到第二朝，休息兼睇波。Samson話當晚有英格蘭對斯洛文尼亞同德國對加納，就算被困幾個鐘都唔怕悶啦！