政情：顧明均爽快捐一億畀浸大
著名廠商南太電子創辦人顧明均○四年用咗半個鐘，就扑錘捐一億畀浸會大學。尋日以顧明均命名嘅展覽廳舉行命名典禮，校長吳清輝再次講起呢件美事都依然印象難忘。校長話，當時大家坐低，佢講大學要點發展，顧生就一路聽一路計數，大概要一億，於是好快就做咗決定捐一億。顧生仲講明唔要冠名，所以吳校長笑言今次游說咗好耐，顧生先肯接受。
顧生覺得做父母要供書教學，學校資源不足，政府補助唔夠，就會難為咗校長，所以佢大讚吳校長同其他大學校長都係盡埋父職做慈父。顧生仲話如果有能力有機會嘅話，佢會再捐少少，但就幽默叫大家唔好以為佢有好多個億。
除咗捐畀大學，身為全世界Screaming Eagle最大收藏家之一嘅顧生，今個月初喺美國加州著名釀酒區Napa Valley新一屆佳釀拍賣宴會上，以一百五十多萬元投得一支極罕有嘅六公升Screaming Eagle紅酒。顧生話呢次都係做善事，因為收益會幫助Napa嘅醫療同教育，等老年人同青年人受惠。