政情：世盃頻爆冷 陳祖澤笑呵呵
馬會主席嘅陳祖澤（John）尋日出席科大榮譽院士頒授典禮。前晚余曾辯，John都有欣賞，不過佢就唔評論邊個講得好啲，淨係話雙方表現都唔錯，因為大家都講出論點，認真夠圓滑。
不過講圓就點都唔及世界盃個足球，John話佢前晚都睇咗兩場波，大讚畀阿根廷大炒四比一嘅南韓打得唔錯。但係John就無睇到法國對墨西哥嗰場，但佢都知法國輸咗二比零。佢仲覺得法國今年無冠軍相，所以輸都唔出奇，不過依家都未輸晒，事關仲有一場未踢，所以數字上仲有機會。
今季各勁旅表現失準，反而二線球隊好似仲好睇啲，總之頻頻爆冷，好似John最愛嘅巴西都只係贏咗北韓一粒咁多，John就維護住愛隊，話依家只係頭一輪，好似魚生粥咁僅僅熟就夠啦。對於連場爆冷，阿John聽到又再使出佢嘅圓滑球技……哈哈哈，笑而不答。咁又係，尋晚德國輸畀塞爾維亞一比零，咁爆大冷法，做莊嘅馬會贏到笑，阿John做馬會主席唔笑就奇。