政情：C18面世前綫成歷史
立法會廠商會代表林大輝秘密籌組嘅「C18」（社區18）地區聯盟終於面世，廿九日喺林大輝中學禮堂舉行成立儀式酒會，請咗民政事務局局長曾德成同中聯辦副主任周俊明主禮。大輝喺自己間中學搞酒會，有「C18」成員覺得唔應該喺中學搞政治嘢，但亦有成員估計大輝想騷吓自己間直資中學喎！
心形標誌曝光
我哋之前講過，面對連串選舉，「C18」進可攻，退可守。成立酒會請柬面世，心形嘅標誌曝光。大輝話，個組織以香港為根，以社區為家，心繫民生事務，心繫社區事務。呢啲口號，一樣係進可攻，退可守，個組織做啲乜，留畀大家好大嘅想像空間。張請帖除咗列出大輝在內嘅三十五名區議員成員名單外，仲有四名顧問成員，包括廠商會會長黃友嘉及「五散人」除咗陳茂波之外嘅其他三散人。
「C18」成立外，尋日政府憲報又刊登兩個政團申請將政團標誌納入選票上嘅候選人詳情，包括經濟動力及西九新動力。不過，已過檔民主黨做副主席嘅劉慧卿一手湊大嘅前綫，政府刊憲取消有關政團嘅標誌登記，意味佢嘅歷史任務已完。