政情：煲呔曾又做無間道？

煲呔曾前晚電視辯論一敗塗地，尋日親中陣營到處竊竊私語，對煲呔曾嘅差劣表現嘖嘖稱奇，質疑呢招係煲呔曾嘅苦肉計。煲呔曾正諗盡方法猛烈游說中央接受民主黨提出嘅區議會方案，但中央一直未首肯，依家煲呔曾藉辯論激起更多市民反對政改方案，咁就大條道理，央求中央放行區會方案，挽救港府頹勢啦。如果呢個質疑真確，煲呔曾呢個無間道角色，應該有資格封影帝。

煲呔曾嘅表現，引來劣評如潮。匯賢智庫葉劉淑儀話，煲呔曾唯一可取嘅英文發言部分，佢表現得自信好多，但係中文就好唔掂，「破格」講咗「出格」，「單打獨鬥」變「獨打獨鬥」，回應市民提問時又被人感覺擺官款，應該學習謙虛啲。

實力懸殊 講笑遮醜

工聯會黃國健以「不忍卒睹」形容煲呔曾嘅表現，揶揄話余若薇應該好多謝佢，提供一個咁正嘅機會擔綱表演。王國興亦指，煲呔曾最大敗筆係唔熟書，好似余若薇問「起錨」會去邊，煲呔曾連一七、二○年都唔識答，真係服咗佢。自由黨主席劉健儀則彈煲呔曾講嘢無新意，常委田北辰直頭話，激起咁多人反對政改方案，今次真係多得煲呔曾囉！

煲呔曾尋日以講笑方式為自己遮醜，話余若薇同佢嘅辯論，好似世界盃「阿根廷對南韓」，實力相差太遠，老婆鮑笑薇仲笑佢，南韓都打得過對方嘅半場，而佢就半場都未過到。特首辦主任譚志源亦喺Facebook留言為老細辯護，話煲呔曾捨安舒而選擇搵余辯論，係僕人領袖喎。佢哋點樣掩飾，都不能遮蓋煲呔曾攞嚟衰呢個事實。