中環出更：低碳裝考起名人二代

青年企業家訪問團周三浩浩蕩蕩地出發，抵達後參加歡迎晚宴，周四早上參觀津灣廣場、天津市規劃發展及海河意式風情區，中午進入戲肉，與張高麗共進午宴。按上屆經驗，與省市領導宴會慣常要執到正，點知嗰日早上出發後，大家才獲悉要着低碳裝，即係環保裝束，唔打領呔、着淺色恤衫同西褲。

團友裏面，除咗身兼團長嘅全國青聯副主席黃英豪及曾智雄、顧問曾智明着啱服飾之外，其餘個個都要臨時除下領呔同西裝褸，好似隨團嘅中聯辦副主任王志文及青年部副部長李薊怡、霍啟剛、莊士集團太子爺莊家彬、香港青聯主席陳仲尼、駿豪集團副主席朱鼎健（Ken）、全國政協常委楊孫西兒子楊華勇等，就連由北京趕往天津參加午宴嘅菁英會創會主席施榮忻都同大家一樣咁狼狽。

不過世事好奇妙，訪問團下午參觀渤海新區東疆保稅港區後，突然風雲變色，天色黑如深夜，更加落雹，氣溫降至廿一度，除下嘅西裝褸就大派用場，唔使冷親。講番當日午宴，張高麗提及過去喺不同省市工作時認識咗好多二代嘅長輩，所以佢希望大家返去轉達問候，特別係認識多年嘅前人大常委曾憲梓，感謝曾憲梓過去對佢工作嘅支持。

訪問團成員前日早上參觀仍未換上低碳裝，左起：霍啟剛、吳傑莊、莊家彬、黃英豪、莊家蕙、陳仲尼、曾智明、楊華勇及白富鴻。 （特派記者潘筱璇天津傳真）	霍啟剛（左起）、蔡偉基、莊家彬及歐陽敬孝一齊表演民間傳統藝術「三句半」。	大部分團員在午宴已像張高麗（中）一樣換上低碳裝，左三係施榮忻。
今次訪問團有幾位新臉孔，包括（左起）周祖榮、張俊勇及羅正杰。	張高麗（中）託曾智明（左）及曾智雄（右）代為向曾憲梓問好。

晚會表演 笑料百出

卓妮講多一則笑料，就係訪問團抵達當晚嘅聯歡晚會上，啟剛與表哥蔡偉基、莊家彬及歐陽敬孝四人以北方話表演民間傳統曲藝「三句半」，鈴鈴、喳喳、鑼鼓盡出，一人朗誦一句，每句最後一字要押韻，佢哋嘅主題係凸顯兩地合作，但由於大家事前只綵排了幾次，全靠打天才波，結果有人忘記台詞，笑料百出。

卓妮喺今次訪問團發掘咗幾個新臉孔，包括全國政協常委陳永棋堂姐陳淑玲嘅兒子周祖榮，領盛投資管理經理、前好世界酒樓老闆張成雄兒子張俊勇及羅氏集團二代羅正杰。

卓妮