煲呔曾為求推銷政改，三度起錨，陰招怪招出齊，無論率高官同行或拖老婆落區，都予人做騷及不自然的感覺。平時不燒香，臨急抱佛腳，一流政治家絕不會做；像煲呔曾平時不會放下身段，出來聽吓市民意見，捉住一街坊嘅手三分鐘，肉麻到你唔信。內地有《握手歌》：握着上司的手，點頭哈腰不鬆手；握着紀檢的手，渾身上下都發抖；握着財務的手，拉起就往餐廳走；握着老婆的手，一點感覺都沒有；握着情人的手，彷彿回到十八九。
今煲呔曾熱情如火，對街坊就像對「上司」，緊握人家的手三分鐘不鬆手。要是平常多落區聽取民意，入去茶餐廳食個菠蘿包，咁唔單止救經濟，更可挽民望。一個政治家嘅形象，係一滴一滴咁建立嘅，積少成多，變成大海汪洋，突然間熱情，即使老婆都會起疑心：平時花都唔送朵，忽然送粒三卡美鑽，個衰公梗係做咗啲對我唔住嘅事！
筆者建議煲呔曾向現任日本首相菅直人好好學習，他推動日中友好關係，從一九八五年至二○○九年，二十四年來堅持每年主辦一次聯誼交流會，免費招待五十名東京工業大學（他的母校）的中國留學生和日本青年；也曾多次邀請中國留學生到他家作客包餃子。呢種細水長流的情懷，從任何一個角度看，你都不會覺得佢做騷。
講開又講，煲呔曾話要「一簑煙雨任平生」，要人信係要建立形象嘅，菅直人就曾因「漏繳」國民養老金而自我反省，三次剃髮出家修行，孤獨走了五百三十多公里，一身布衣，頭戴斗笠，腳着草履，其苦行僧形象深入民心。煲呔曾，Act now!