政情：小周澄畀學校賣豬仔
最近有唔止一間學校逼學生參加撐政改遊行。同樣來自傳統左派學校培僑中學嘅「大專2012」成員周澄原來喺讀書時都畀學校賣過豬仔，初中時佢糊裏糊塗被學校安排做義工，幫咗建制派區議會候選人拉票都唔知。
尋日周澄參加完「大專2012」遊行之後憶述，九九年佢仲讀緊中一、中二嘅時候，學校曾經安排佢同其他同學去做義工，話要幫區議會選舉嘅候選人拉票，有啲就去幫手做票站調查，當時入世未深嘅佢鑑於學校安排，不虞有詐，所以就去咗幫手，當然都係事後先至知道自己幫緊嘅係建制派候選人，至於幫咗邊個，佢依家諗極都諗唔起。
對於近期有學校逼學生去遊行，佢覺得學校嘅做法好有問題。周澄小時候有過畀人賣豬仔嘅經歷，可能激發起佢嘅反叛，入咗大學之後，特登要走去另一個極端。變成走去立法會公眾席大叫口號，又參加立法會補選。