政情：金刀梁食糉唔怕肥豬肉
端午佳節，唔少得食糉應吓節，但包糉餡料離不開肥豬肉、鹹蛋黃，歎一隻隨時食埋唔少脂肪同膽固醇。不過天生瘦身材嘅行政會議成員梁智鴻就話照食可也，反而立法會飲食界議員張宇人（Tommy）錫身，食糉時會挑走晒糉內嘅肥豬肉。
尋日落雨濕濕，金刀梁約埋醫生朋友入沙田馬場食飯。講起邊類糉最好味，金刀梁話：「我乜糉都食，有肥豬肉都唔怕。」仲話間唔中食幾舊，更覺滋味無窮。又難怪，金刀梁連肚腩都冇，當然大把本錢！
本身挺住個肥肚腩但近年瘦身成功嘅Tommy都係「糉迷」，尋日現身馬場講起食糉心得就滔滔不絕，Tommy話，家中雪櫃內乜糉都有，個人偏愛鹹味糉，但動筷前會先剔走晒糉內嘅肥豬肉，免得變成大肥佬。