政情：強拍苦主 要林鄭收留愛犬
醫學會前會長蔡堅係愛狗之人，佢住喺太子道西皇子大廈，樓齡有四十幾年，座樓被發展商睇中，已經收購咗近七成業權，蔡醫生快將成為強拍苦主，佢尋日帶埋隻愛犬出嚟，話如果被迫遷，狗仔無處容身，就要發展局局長林鄭月娥收留。
蔡醫生話，幾年前睇到內地有釘子戶抗爭到最後一刻，唔想香港都係咁，點知話口未完，舊樓強拍門檻就由九成降到八成，而佢間樓係結婚時阿媽畀錢買嘅，住得好開心，有一個溫馨回憶，所以挺身而出反對強拍。
同樣快將成為強拍苦主嘅仲有前投資推廣署署長盧維思（米老鼠），佢住喺柏道瑞祺大廈，樓齡四十七年，相信好快會有發展商收購重建。立法會議員葉劉淑儀就搵埋蔡醫生同米老鼠，組成「八成強拍監察組」，話要幫強拍苦主為民請命，向政府施壓。
大家都係前高官，失意於官場，同聲同氣，米老鼠係咪有意加盟葉劉嘅匯賢智庫呢？米老鼠就話無同葉劉傾過，暫時只為強拍走埋一齊。