政情：任總自駕遊日歎鮑賞櫻

最愛北海道函館

大約半年前先至去日本九州自駕遊嘅任總，尋日喺網誌上分享佢同太太嘅北海道之旅。呢次佢去咗洞爺湖、小樽、札幌同函館，任總話可能以往無去過嘅緣故，所以覺得函館特別好，仲話鮮鮑、北寄貝同毛蟹等海鮮都非常美味，見到開得非常燦爛嘅櫻花亦好驚喜。

任總係中大全球經濟金融研究所研究員，佢話研究所會喺下個星期一有場演講，預告到時會就人民幣離岸中心發言。其實睇到任總同太太嘅旅行合照就可以想像，佢得閒就去外遊、久唔久就去演講嘅退休生活係多麼的愉快，話唔定遲啲佢就變日本通，可以出旅遊書講日本自駕遊攻略。