政情：未夠鐘煲呔曾諗定「起錨」

話時話，煲呔曾喺電視接受鄭丹瑞訪問，話自己已經諗緊兩年後執包袱時要搬乜嘢走，仲話自己同老婆結婚多年，搬屋搬過十次，次次都會為搬走啲乜而同老婆頂頸。其實佢仲有超過兩年先落任，煲呔曾依家就諗定執包袱，唔通佢嗌起錨嗌得多，自己都預備好隨時起錨？

其實煲呔曾嘅生活都充滿矛盾，訪問期間，佢突然話自己一日做十二粒鐘，退休後要啲時間適應。一時講到自己好勤力、一時又話諗緊執包袱，簡直係思覺失調。

滿肚退休大計

煲呔曾講過退休之後會離開香港，佢話去邊仲未知，身為天主教徒嘅佢仲好想學希臘文同希伯來文，因為聖經新、舊約原版就正正係分別以呢兩種語文撰寫。煲呔曾仲話，呢兩種語文係世界上最難學嘅語文之一，退休後可以全神貫注咁學，如果唔係，「上天」都學唔晒。咁考慮吓早啲退休早啲開始學喇，希望「上天」之前有機會學得晒喇。

至於尋日佢去龍舟活動，究竟聽到記者問乜，令佢狂嗌起錨呢？首先係有記者問佢，點解起錨騷愈做得多，支持政改方案的市民就愈少，煲呔曾明明聽到記者嘅問題，佢望住記者，嗌起錨。然後有記者問佢對今日喺電視同余若薇嘅辯論有冇信心，佢又係唔理三七二十一，大嗌起錨。第日退咗休，唔知仲會唔會日日嗌起錨？唔知希伯來文同希臘文裏面，起錨點講？佢應該乜都唔好學，先學嗌起錨囉。

盧維思寸愚蠢

對於今日嘅辯論，余若薇就話，有心理準備煲呔曾有「出乎意料」嘅舉動，佢自己亦有秘密招數應付，唔知係咪預咗煲呔曾出茅招。而煲呔曾嘅舊部、前投資推廣署署長盧維思都加入贈興，話舊老細冇必要成日嗌「起錨」，咁做係「愚蠢」嘅，只要游說議員支持就夠。佢又提醒舊老闆，喺電視辯論時要冷靜，同埋唔好發老脾。其實冇問題嘅，煲呔曾今日喺電視辯論上，答不上話嘅時候就大嗌起錨咪得囉，市民都已經見怪不怪喇。