中環出更：鄧太千萬鑽飾閃爆馬場
太子珠寶鐘錶尋日喺沙田馬場舉行首屆「太子珠寶鐘錶精英盃」賽馬日，請來近三百位嘉賓。太子珠寶鐘錶主席鄧鉅明得到太太鄧宣宏雁做生招牌，親身示範靚珠寶名錶。鄧太以本港時裝設計師何國鉦為佢度身訂造嘅銀白色喱士裙，配襯過千萬元首飾。其中水滴型鑽石戒指最貴，要四百萬元。
鄧鉅明孝順好榜樣
向來係卡地亞迷嘅鄧太為咗襯衫，尋日改戴伯爵錶，成隻鑲滿鑽石嘅經典百萬伯爵錶閃爆全場。鄧太甜絲絲話，戴咩首飾，老公偶然都會畀意見，好似尋日就幫佢揀咗藍寶鏈墜襯同系列戒指。
不過唔好以為鄧生淨係廿四孝「孝順」老婆，查實佢對媽咪仲孝順，話說尋日佢收到電話，知道老婆座駕到咗馬會門口，即刻九秒九極速由廂房跑落大門口，不過佢見到老婆say咗個hi之後，就拿拿臨拖實太太後面八十八歲嘅媽咪上廂房。老公咁孝順，本身係一個好榜樣，難怪鄧太一啲都無呷醋，仲對奶奶相當照顧添。