中環出更：鄭志剛拖妻刨食譜煮飯仔
新婚大半年嘅新世界發展主席鄭裕彤長孫鄭志剛（Adrian）婚後生活溫馨。Adrian尋日趁端午節假期，同太太余雅穎行書店「打書釘」。千億王國接班人到底鍾意睇乜書？答案係：烹飪書。鄭太知老公心意，扑錘買咗本烹飪大全，返屋企同老公玩煮飯仔！
便裝行書店
卓妮尋日睇完龍舟賽後，晏晝三點幾喺金鐘太古廣場書店Kelly & Walsh
吓有乜新書，抬頭發現Adrian同太太喺人堆中揀緊書。平日保鏢不離身嘅Adrian，呢日終於回復自由身，變身尋常百姓，拖太太齊逛書店。
Adrian着上運動裝、牛仔褲，下襯紅波鞋，表現輕鬆。佢同太太先行去售賣烹飪書籍嘅書架前，各自攞咗幾本書細心研究。不過啲書似乎唔多啱Adrian心水，惟有行去書店另一邊睇吓有冇新發現。
拎袋顯風度
揀咗十分鐘後，鄭太終於搵到心水新書，佢興奮地攞住本英文烹飪書埋去櫃位畀錢，Adrian就企近門口位耐心等待，一見太太畀完錢，就主動上前幫太太抽住袋書，盡顯男士風度。
卓妮上前打招呼，Adrian顯得有啲錯愕，然後報以微笑。問佢買咗乜書睇，Adrian話：「冇呀，求其買啲書睇吓！」佢話太太鍾意睇烹飪書學煮餸，但鍾情邊位烹飪大師嘅食譜就唔講嘞。
卓妮