政情：許曉暉「播帶」播到語塞
民政事務局副局長許曉暉上任一段時間，但對住傳媒仍然未能揮灑自如。許曉暉尋日以署理民政事務局局長身份出席「睇波不賭波‧健康齊踢波」活動，喺開幕致辭時已經講咗一輪政府點樣宣揚不賭波嘅訊息，但到台下見記者，都係重複一次開幕致辭講過嘅嘢。
其實依家好多高官為免講多錯多，個個都經常重複埋啲官式答案。其實咁都冇乜所謂，反正大家都習慣晒，點知許曉暉尋日唔知搞乜鬼，問佢有咩團體承諾咗會一齊宣揚唔賭波訊息時，佢竟然停咗喺度，要身後嘅局長新聞秘書提水，不過又係講番之前致開幕辭講過嘅嘢，講完仲即刻走人。
唉！許曉暉臨時幫德成局長做替工，可能連篇講稿都要生吞硬剝，咁先至記唔實，睇嚟替工一啲都唔易做！