政情：議員講世盃大輝貼四強

前日世界盃開幕，議員各有心水，但係巴西同西班牙呢兩支強隊就最受熱捧。大輝話佢睇好西班牙，覺得佢哋隊波夠晒全面，但隻世界盃佢就覺得會落入巴西之手。已經睇晒分組圖嘅佢，睇好巴西、西班牙、德國同英格蘭係四強之選，佢仲話以足球藝術角度嚟講，最想見到巴西同西班牙對壘。咁啱李華明都係最想睇呢場，不過肥仔明就捧英格蘭，但係佢覺得愛隊勝算極微。

IT豪同大輝一樣熱捧西班牙，事關球隊有幾個佢鍾意嘅球星，又踢得好有味道。不過佢同大輝一樣唔敢批愛隊一定贏，話要睇咗第一場先知佢哋有無冠軍相。黃成智就係巴西粉絲，大讚佢哋扭波踢波頂瓜瓜，不過為免第二日唔精神，所以謝絕凌晨兩點半開場嘅賽事。

陳淑莊當年喺世界盃期間識佢男朋友，講起上嚟都有兩屆咁耐，不過佢哋兩個都鍾意搓波多過射龍門，有交流唔使入球都開心，所以無意喺下屆世界盃埋齋結婚。