政情：高錕攞完諾獎再封爵

其實高錕同英國好有淵源，高錕喺香港讀完中學之後，就去咗英國升學，仲喺英國開始研究光纖技術，奠定日後嘅科研成果，高錕仲喺英國邂逅太太黃美芸，兩人情投意合，喺英國度過好多美好時光。高錕早喺九三年，就已經獲頒ＣＢＥ司令勳章，今次封爵，仲可以順道返英國緬懷一番，唯一唔同嘅係，高錕由無名小卒，變咗影響全世界嘅科學家。

除咗高錕之外，另一名港人張宇強，就獲頒授ＭＢＥ員佐勳章。張宇強九四年就主管英聯邦國殤紀念墳場管理委員會，英國駐香港及澳門總領事館讚揚張宇強過去致力保持委員會高水平運作，將墳場打理得井井有條。