政情：詩姐金刀梁隔空過招

早前我哋都同大家分析過，港府一直好想喺六月廿三日表決政改，因為可以避開七一呢個敏感日子，唔使擔心會谷高遊行人數，又唔怕影響下月中提交立法會嘅最低工資條例草案。加上本港政圈唔少人都認為今次立法會否決方案嘅機率好高，與其拖拖拉拉，不如快刀斬亂麻，早日表決好過。

倘延遲可做足打底工夫

不過最近建制陣營中，開始有聲音傳出想港府押後表決政改。首先，唔少建制中人認為押後表決可以展示姿態，當作向泛民再度釋出善意，順便爭取更多民意支持。即使最終都係否決，更彰顯泛民要為政制原地踏步負上最大責任。

其次，中央政府好關注本港嘅「後政改年代」，一旦政改方案被否決，泛民一定會歸咎於港府及北京，甚至要求煲呔曾引咎辭職承擔責任，依家民意已經唔合格嘅煲呔曾必定好難再繼續推動其他民生政策。如果方案可以延遲表決，等各方做多啲打底工夫，務求將否決政改嘅傷害性減到最低。

更重要嘅係，《基本法》講明本港政制要循序漸進達致普選，雖然中央已經承諾一七及二○年可以普選特首及立法會，但如果今次方案再被否決，到一七年實施普選時，點都會有人質疑過程唔符合循序漸進原則，將來香港政制何去何從，相信好多人都好關注。

雖然最終表決日期要等中央拍板，但民主黨高層已經講明，除非中央肯全面接納區議會方案，並於二○一二年付諸實行，否則押後表決都冇乜意思，民主黨點都會否決。不過佢哋都明白，如果中央肯讓步，點都需要時間安撫建制派及敲定區會方案嘅細節，延遲表決都未嘗不可。政治一分鐘都嫌短，到底政改係咪延遲表決，本周就會有定案，大家不妨拭目以待！