中環出更：盛智文充最牛嚮導
海洋公園主席兼有「蘭桂坊之父」稱號的盛智文（Allan Zeman）百足咁多爪，業務遍布中、港及泰國等地，仲係永利澳門有限公司副主席兼非執行董事。做得公司董事，同老闆關係當然好密切，卓妮前日就撞到「永利」主席兼行政總裁史提芬永利（Stephen A.Wynn）由澳門嚟咗香港，扮嘢文就充當嚮導陪伴左右，帶Stephen同佢嘅女友甜甜蜜蜜搭天星小輪到尖沙咀Shopping。
陪永利老闆Stephen遊港
前日下午五點接近放工時間，卓妮見到扮嘢文企喺太子大廈門外講電話，身邊仲有個戴太陽眼鏡及食雪茄嘅外籍成熟男士。睇真啲，原來係永利老闆Stephen A.Wynn，Stephen身旁仲有位年輕貌美嘅外籍女性朋友，永利澳門執行董事兼營運總監陳志玲（Linda）亦有隨行。一行人橫過遮打道後穿越行人隧道，再經過怡和大廈行人天橋朝天星碼頭方向行去，邊行邊交談。
扮嘢文行天橋期間，遇到環保組織「綠色和平」搞街頭宣傳，佢好樂意簽名支持，仲喺褲袋掏出一大疊金牛諗住捐錢，點知職員話唔收得，扮嘢文惟有將疊錢袋番落褲袋。之後一行人繼續向天星碼頭進發，大約五時二十分抵達，扮嘢文與Linda就行到售票機為大家買飛，之後走向尖沙咀方向閘口等候登船。一路上，Stephen與嗰位女性朋友好似糖黐豆咁，Stephen時而攬住女友嘅纖腰，連行緊上渡輪都要翹住女友嘅手，簡直就係一對熱戀中嘅男女，難得盛智文無乜唔自然，樂做電燈膽。
卓妮尋日搵到扮嘢文，佢話當日啱啱喺中環同Stephen開完工作會議，跟住陪Stephen同佢女友過尖沙咀購物，夜晚去蘭桂坊盛智文間Tokio Joe歎日本菜，尋日四點幾至返澳門，所以只係喺香港過咗一晚。扮嘢文仲爆料，話Stephen經常來港開會、見客、購物、去蘭桂坊幫襯，好嚮往香港嘅人和事。
遇環團速掏錢博甩身
咁扮嘢文點解又咁大手筆捐金牛畀綠色和平呢？原來佢係為咗「甩身」。話說佢當日行行吓，綠色和平職員上前叫佢簽名支持環保，但Stephen喺度等緊佢，扮嘢文諗住捐錢可以快啲甩身，只係最後捐唔成。不過，佢都同卓妮話，自己一向撐環保，除海洋公園搞環保外，仲定期捐錢畀世界自然基金會（WWF）架！
卓妮