今年二月履新的平機會主席林煥光，果然有啲火，炮轟政府及房委會轄下建築物無障礙設施未達國際標準，部門之間又各自為政，要改善無障礙環境，「做一百年都做唔好」。何以至此，乃一眾高官，心目中沒有「百姓」也。所謂「關愛文化」，一如「起錨騷」的搞笑，有姿勢冇實際。
當年，李自成率兵攻破北京，崇禎皇帝煤山自縊，死前留下「任賊分裂朕屍，勿傷百姓」的遺言。就憑這句遺言，臨死還心繫百姓安危，這崇禎皇帝也就壞不到哪裏。而我們的高官不接觸民間的生活，只活在自我中心，與整個時代脫節。是以政府一味吹水香港有多少優勢產業，亂花漸欲迷人眼，可實情是，連傷殘人士的真正需要也不知，豪裝殘廁無所用；最要命的，幫唔到都算喇，還要靠害！
平機會揭發的殘疾人士陷阱，有必要速速改善，像灣仔鵝頸街市供輪椅人士用的斜路前還有一級，隨時令他們拋出輪椅受傷；又如摩利臣山游泳池的緊急召援鐘，安裝在洗手間門口處，高度達一點四米，違反應裝在廁格內、離地面六十厘米的規定。傷殘人士一旦遇險，須爬出廁格才能求助。
老朽但願高官心繫百姓，像以上「有障礙設施」要火速改善，唔好連啲咁簡單嘅嘢，都要等十年八載先拍板，或者唔死人就唔做嘢。少啲做「起錨騷」，搵日由煲呔曾率三司十二局，加一眾副局常秘，齊齊坐輪椅去各區感受一下「無障礙設施」是否達標，相信由心出發，用真實行動去體驗後，高官們便不會咁自我，不會「做一百年都做唔好」，煲呔曾，請帶頭坐輪椅！