政情：大輝寸陳七頭腦簡單？
政府為推銷政改無所不用其極，除搵嚟行會成員拍宣傳片外，連應屆足球先生「陳七」陳肇麒都被拉埋落水，搞到佢班粉絲好不滿，前日陳七要出聲明解畫。陳七喺新一輪「起錨」宣傳片中，以「要入波，最緊要把握機會，向前推進」做比喻，呼籲大家係時候要「起錨」，點知被網民留言柴台。陳七嘅聲明話，佢拍呢條片係基於政府誠意邀請，無收過廣告費，本身亦無政治立場，更唔會游說任何人支持或反對政改方案，仲話對網民反應感到不安添！
鍾意踢波、本身又係沙田足球隊班主嘅立法會議員林大輝聽完呢番話不以為然話，陳七咁樣出聲明回應有啲「唔自然」，懷疑到底陳七事前有無了解、明唔明白政改方案內容。大輝仲寸爆話，陳七應該接受個方案先至拍條片，大家都唔會希望香港嘅足球先生淨係四肢發達喎。大輝咁講，莫非想寸陳七頭腦簡單？