政情：李國麟上「潮」可傾心事
政改方案兩星期後定生死，中聯辦副主任李剛已先後游說多名泛民主派議員支持政改方案，但偏偏以「理性」見稱嘅李國麟就無份見。不過，李國麟都攞番個安慰獎，事關佢報咗名參加陳鑑林（橄欖）同詹培忠（金勞詹）七月底舉行嘅潮汕美食三日團，中聯辦副主任周俊明都會隨團同往，到時大家傾乜都得啦，可能評論埋政改方案表決結果添！
今次美食團行程豐富，玩到邊食到邊，飽覽潮州名勝古蹟外，仲有機會同市政府官員會面，肯定無立法會世博團咁頻撲，所以吸引咗十四位議員報名參加，連同家屬共有卅幾人浩蕩出發。向來被視為泛民邊緣人嘅李國麟話，參加呢個團無話泛民抑或建制之分，主要係想休會後輕鬆吓，加上佢稍後會為汕頭大學一個護士課程做客席講師，所以預早上去了解吓都係好事喎！