政情：肥胡舊時踢波似朗尼
四年一度嘅世界盃聽日（十一日）拉開戰幔，足球迷「肥胡」胡定旭尋日以智經研究中心主席身份見記者，講長者住屋新思維之餘，亦被記者問起世盃賽事預測。肥胡話，暫時未敢論斷，但佢自己就係英格蘭擁躉，鍾意「三獅軍團」既有德國嘅強大紀律組織，又有拉丁足球嘅腳法，正！
肥胡九○年同九八年分別去過世盃主辦國意大利同法國現場睇大賽，氣氛之熱熾令佢至今難忘。不過，今年佢唔去南非嘞，唔通畀南非「罪惡之城」呢個外號嚇怕？非也！肥胡話只係太忙，行唔開啫。咁又係，肥胡公職多多，身兼醫管局主席、智經主席同全國政協委員，已經夠佢忙，最近仲做埋香港總商會主席，百足咁多爪，要飛去南非睇波，簡直係奢侈願望呀。
去唔到南非主賽場，唔緊要，肥胡即場應記者建議，研究喺七月十一日決賽日搞個睇波派對，約埋記者一齊睇波，餓波之情溢於言表。肥胡仲話，睇見英格蘭前鋒「箭頭」朗尼，就諗起年輕時嘅自己，原來當年佢打前鋒橫衝直撞，心口有個「衝」字！