政情：田二少談工資搵阿姨過橋
自由黨中常委田北辰尋日出席一個長者慈善活動時講起最低工資，話自己親阿姨當年好後生就去咗美國定居，阿姨當年大學都未畢業，好在美國當時嘅最低工資訂得唔高，否則阿姨肯定唔可以自食其力，要靠人接濟。
自食其力 唔靠政府
田二少話，阿姨今年已經九十三歲，身體仍然好好，而且健步如飛。阿姨長壽嘅秘訣好簡單，就係長期工作、經常運動。阿姨早年移居美國，二少喺美國讀大學嘅時候就係住喺呢個阿姨屋企，除咗照顧佢起居飲食之外，仲幫佢執正論文上面嘅文法錯誤，兩個人之間嘅感情，亦喺呢段時間開始建立；冇咗阿姨，佢話自己都唔知畢唔畢到業喎。
二少好自豪咁講，話阿姨從來冇靠政府，由於當年美國嘅最低工資要求冇依家香港勞工團體要求嘅咁多，所以阿姨可以搵到份工，所有食嘅住嘅都靠自己。不過睇番資料，田二少阿爸當年係「一代褲王」田元灝，田二少就分別喺康奈爾同哈佛大學讀書；個仔去美國讀名牌大學，既然係阿姨負責照顧佢，田老爺斷估都唔會待薄個仔。二少咁樣將阿姨同最低工資扯上關係，似乎係借阿姨「過橋」啫！