政情：政改對決勢打持久戰

一月立法會財委會審議高鐵撥款，連續三個周末拉鋸進行，共纏鬥二十粒鐘；政改方案表決，有數得計，戰線之長肯定有過之而無不及。本月二十三日，政府向立法會提交修改二○一二年特首及立法會兩個選舉辦法嘅決議案，按議事規則，每名議員有權發言十五分鐘，假設五十九位議員（主席不發言）都發言，就係十五粒鐘，兩個決議案，合共就係三十小時，官員發言更加不限時間，加上投票程序同當日大會原有議程，玩足三日係基本消費。

立法會秘書處作好最壞打算，本來二十四日房屋事務委員會委員約好咗運輸及房屋局局長鄭汝樺，到房屋局開集思會，就最近嘅資助市民置業諮詢文件做腦震盪，不過，秘書處尋日通知委員，改期順延至二十六日，成為預留三日表決政改方案嘅佐證。

二○二○年仍有功能組別？

立法會秘書處亦已經通知職員，由廿三日起一連三日全民皆兵，陪高官同議員一齊捱更抵夜，披星戴月，預計第一日由朝早十一點開到夜晚十點；第二日緊接由朝早九點續會，晚上十點中場休息；第三朝九點再作戰。立會職員勢必成為呢場政改方案表決持久戰中，除政府、議員同示威者外，第四類最關注戰事長短嘅人。反高鐵撥款一役，「八十後」搭指揮台、辦嘉年華，「623」隨時要喺立法會大樓外餐風宿露兩個夜晚，唔知今次又有乜新花臣呢？唔會誇張到搞營火會啩！不過，警方都有備而戰，港島總區全部警員將喺二十三至二十五日一連三日取消放大假，但例假照放。

政改方案表決大戰，外界開始落盤，邊個泛民議員最有機會被政府「撬票」，回心轉意支持方案。一向語不驚人誓不休嘅「金勞詹」詹培忠，尋日喺立法會走廊話，今次形勢明顯，一係泛民「綑綁」策略成功，二十三票一齊反對，一係就普選聯嘅十四票集體歸邊，方案以五十票高票通過。佢仲預言，話二○二○年普選立法會時，功能組別仍然存在咁話，大家又睇吓佢嘅水晶球有幾靈驗！