中環耳目：許曉暉推介心齋特色小菜
都市人多肉少菜，間中食齋都係個好選擇。如果嫌普通齋菜唔夠吸引，可以試吓民政事務局副局長許曉暉（Florence）推介嘅「心齋」齋菜館。
「心齋」位於中環花園道五十一號科達中心，Florence貪返工就腳之餘，仲鍾意佢哋嘅齋菜既美味又有特色，所以放假都會同愛女去開餐。Florence最喜歡「椒鹽金菇」，其愛女就鍾意食香口嘅「蘿蔔絲酥餅」。
鍾情椒鹽金菇
「心齋」齋菜館不但環境舒適，齋菜亦夠晒特色，凸顯廚師嘅心機同功夫，好似Florence鍾意嗰味「椒鹽金菇」，廚師並無偷懶將一大束金菇落鑊炸，而係逐條金菇撕開去炸，食落好似薯條脆卜卜。
另一味招牌菜「荷塘吐艷」更係一絕，先將厚薄適中嘅冬瓜片包住蓮子捲起，然後鋪砌喺西蘭花基座上蒸熟，最後加上芡汁，有人話賣相似佛像頭上髮髻。
至於製作同樣出色嘅「咕嚕魔芋」，與真嘅咕嚕肉極之相似，雖然有點齋口唔齋心，但味道確係值得一讚。
「心齋」其他菜式還有三色香菇飯、南瓜咖喱配蒜蓉包，甜品麻沙糍及杞子桂花糕都做得精緻出色，麻沙糍中嘅芝麻都係新鮮即磨，香滑美味。
卓妮