中環出更：霍英東大樓動土天公作美
香港尋日天色驟變，更有雷暴警告，平日插針都唔入嘅中環鬧市，都少咗人潮。啲人去晒邊？原來有啲去咗南沙出席「香港科技大學霍英東研究院大樓」動工儀式。動土係大件事，霍家老二霍震寰擇好良辰吉時切燒豬，果然天公作美，莫非霍老在天之靈喺背後發功？
已故全國政協副主席霍英東生前有個「南沙夢」，晚年更捐咗三億元，同香港科技大學合作喺家鄉廣州南沙興建研究院，當中耗資一億八千萬元嘅研究院大樓，尋日動工嘞。霍家空群出動，由霍老次子、霍英東集團行政總裁霍震寰帶隊，拉埋細佬震宇、霍家三房四子霍顯強，仲有霍家第三代接班人啟剛、啟山同啟文出席，陣容鼎盛，卓妮都貢咗去。
霍震寰入鄉隨俗，同科大校長陳繁昌齊齊行去工程地盤前切燒豬。呢幢大樓預計明年十二月落成，距離研究院○七年嘅奠基儀式，足足隔咗三年咁耐。曾經有報道話霍家後人事事問回報，令大樓只聞樓梯響，工程延誤，研究院依家都係租用南沙資訊科技園嘅地方做研究。對於呢種講法，霍震寰就唔認同，佢反駁話，研究院一直有做研究工作，而大樓嘅設計需要修改，先會延遲工程。
60億投南沙 圓霍老心願
研究院院長余同希都補充，大樓設計由香港公司負責，設計圖需要修改到符合內地安全規範，所以搞咗咁耐喎。
所謂「慢工出細貨」，新大樓極之宏偉，建築面積有成兩萬五千平方米，最高去到五層，可容納八百名研究生，內裏有齊實驗室、圖書館、電腦室等。雖然受內地條例規管，科大唔可以獨立開辦本科生課程，但研究院未來會主力收研究生，又會同華南理工大學合辦碩士課程。
霍老生前落重本發展南沙，霍生話，嚟緊將會加碼，打算投資五十億至六十億元人民幣，包括興建遊艇會俱樂部，首期工程年底前就會完工，配合年尾喺廣州舉行嘅亞運會，霍家仲會畀錢開設來往南沙至澳門航線，月底就開通。重頭戲當然唔少得霍家揸旗喺南沙嘅地產項目，霍生話打算明年開賣添。睇嚟霍震寰嚟緊有排忙。
卓妮