政情：蔡堅楊超發爭位駁火
代表全港八千名醫生嘅醫學會即將改選，現任會長謝鴻興唔再連任，佢嘅好兄弟、前任會長蔡堅決定重出江湖競逐會長一職，硬撼西醫工會會長楊超發。蔡醫生話今次選情之激烈實為近年罕見，除咗會長一職有競爭，仲會有三個人角逐兩個副會長職位，更有十五個人爭六個會董位，但係佢依然信心十足，話自己張參選名單勝在個個有會務經驗，佢自己過去十年不論喺醫學會定係醫務委員會嘅會議，出席率九成以上，相信會員睇得出佢係有心服務。
楊超發亦不甘示弱，話今次參選係為咗打破近年醫學會嘅「一言堂」，佢自組嘅參選名單有八成都係新面孔，實行要好似美國總統奧巴馬咁帶來「轉變」。佢唔客氣話醫學會近年同政府走得太近，又批評近年醫學會領導層閉門造車，未能真正反映醫生意見，仲承諾一旦當選，會不時落區收集民意添。
兩位醫生未正式開始拉票，已經隔空駁火當做熱身，睇嚟今次都有一番龍爭虎鬥。醫學會稍後會向全體會員郵寄投票表格，一人一票揀出心水候選人，投票將於下月八日截止。