政情：日本總領事難捨香江
日本駐港總領事佐藤重和近日收到東京指令，要返日本老家！佐藤來港三年零九個月，當正香港係第二個家，仲學埋地道廣東話，算係半個香港人嘞。離別在即，佐藤寫咗一封四頁紙嘅信畀傳媒朋友，盡訴不捨情懷。
數任內難忘事，佐藤話其中一件係爭取恢復日本和牛輸港。香港人或者忘記咗，幾年前瘋牛症肆虐，香港曾禁止日本和牛入口，禁足五年。
為挽回港人食日本牛肉信心，佐藤○八年喺山頂官邸大搞和牛宴，成為城中佳話。如今各大食肆都有和牛歎，睇怕都要多謝聲佐藤先生嘞！
香港生活節奏快，行步路慢啲都會畀人鬧，原來佐藤都有同感，佢話香港街道有時幾逼幾嘈，香港嘅電梯比東京更快，不過港人嘅勤力、創意，重視公平同誠實，令佢好欣賞。佐藤都關注香港政制發展，話期待政改有進展喎。