政情：局長議員齊捱臭彈

七點後閂埋抽氣

ＣＧＯ西座所有廁所最近貼出通告，通知所有「用戶」因鹹水喉爆裂，廁所沖水喺非辦公時間內暫停供應。原來ＣＧＯ附近嘅護土牆鹹水管老化喺上月廿二日爆裂，影響晒ＣＧＯ西座嘅廁所，只能作「有限度開放」，以便維修鹹水管。有關安排係：廁所喺六點後冇水沖廁，七點後仲連中央抽氣扇都閂埋，有挑燈夜戰文化嘅ＣＧＯ中人，問你哋點頂？

有喺裏面做嘢嘅人話，ＣＧＯ西座廁所情況之惡劣，真係不足為外人道。因為咪以為喺六點鐘前收工就冇事，事實係ＣＧＯ嘅清潔工一向人手不足，大家朝早返工入廁所，好可能衝咗入去一個隔咗一夜嘅「戰場」，真係中人欲嘔，諗都諗到有幾恐怖。

ＣＧＯ西座係重要嘅政府建築物，因為呢度係幾個政策局嘅大本營，喺呢度返工嘅，包括教育局局長孫明揚、發展局局長林鄭月娥同財經事務及庫務局局長陳家強等，仲有佢哋嘅副局長同政治助理，數埋都唔少人。唔單止官多，呢度立法會議員亦多，ＣＧＯ西座係立法會議員辦事處嘅集中地，唔少政黨嘅議員同助理平日都喺度開會或見客。所以呢度冇水沖廁，真係為唔少達官貴人造成不便。

為咗要徹底解決問題，ＣＧＯ西座嘅主要入口喺聽日同本月十六日要封閉，要出入就要經雪廠街入口，睇嚟惡劣情況仲要維持半個月至有望收科。

特區政府為政改「起錨」，甩漏百出，令人慘不忍睹，連政府總部嘅廁所都發生「大事」，顯示呢個政府真係「諸事不宜，諸事不利」。如果有局長黃昏趕住落區派「起錨」單張，都係落區借埋廁所好過。