政情：王桂壎冧莊掌律師會

王桂壎去年接任律師會會長以嚟，頻頻有新搞作，好似推動「律師關愛社區行動」、開展專為中學生而設嘅「友出路」師友計劃，同埋帶領律師會首次在港主辦「兩岸四地律師高峰會」咁，都得到唔少回響，跟住又因狂踩校本自願驗毒計劃而聲名大噪，所以佢連任律師會會長，算係眾望所歸，選舉結果屬正常。

王桂壎係粵劇發燒友，連任律師會會長，未來一年可能要犧牲一下操曲時間嘞，事關佢已為新任期訂下工作藍圖，好似爭取香港律師行以「有限合夥制」形式營運，同埋幫香港律師行發展珠三角業務咁，又話會將協助會員減輕成本同增加收入列為來年首要工作，呢一條相信最受律師會會員歡迎啦。