政情：吳清輝送花辣興愛妻
浸大校長吳清輝返埋六月尾就榮休，呢排頻頻食餞行飯，尋日輪到同傳媒朋友話別，平日好少露面嘅吳太郭蜀華都嚟撐老公。吳清輝大爆太太當年多人追，吳太就埋怨老公唔夠浪漫，婚後第一次收花，竟然係一束浸大用剩嘅鮮花。
吳校長同太太結婚逾三十年，老婆係陶藝家，好少見報，尋日親自出馬整咗一批陶瓷擺設及飾物送畀記者，非常難得。吳校長同太太相識於留學加國時，彼此因活躍於「中國同學會」而互生情愫。吳太講嘢風趣，尋日更大爆老公瘀事，埋怨老公當年將一束本來係送畀訪港冰球隊嘅花束轉贈畀佢，激到佢紮紮跳。
其實吳校長痛錫家人，只係唔想嘥錢啫。工作疲累時，佢會叫千金幫佢按摩，原來吳千金都係傳媒人，仲係駐京記者。
講番去向，吳校長話遊完歐洲充電後，將移居珠海做聯合國際學院（UIC）校長，外間對佢出任呢個位議論紛紛，吳校長直言覺得好可笑，佢話自己已兼任該校校長多年，工作能力有目共睹喎。