政情：婆婆大鬧港鐵股東會 錢果豐尷尬

陳婆婆喺發問時間一開始就搶先發言，一嚟就鬧港鐵極之孤寒，無照顧小股東嘅飲食需要，佢好似機關槍咁掃過去：「股東會一支水都冇，人哋『八號仔』咁窮都有兩張餅卡，每張五十蚊呀！你哋（港鐵）唔好再折磨我哋啦！仲有台前點解有欄唔畀我哋上去，主席你係咪驚我上台找你麻煩，我唔係長毛喎！」

拒握手言和

婆婆之後仲未夠喉，再鬧政府身為港鐵大股東，但負責運輸嘅鄭汝樺同負責財務嘅陳家強就唔知去咗邊，搞到錢果豐要叫政府代表、財經事務及庫務局副秘書長梁卓文企起身畀婆婆睇，婆婆先稍微順番條氣。

雖然婆婆一番話搞到台上眾人不知幾尷尬，但錢果豐好有風度，大讚婆婆好有校長本色，又話落台之後一定要同婆婆握手，可惜陳婆婆無領情，仲話：「你同我握手我一定會暈低。」搞到錢果豐無晒符。