政情：首嘗一桿入洞肥亨宴好友
「我等咗十七年喇，好開心！」以上對白聽落好似演員奪影帝或影后嘅心聲，但其實係中策集團主席馬時亨上周打高爾夫球首次一桿入洞（hole in one）嘅難忘感受。肥亨上周五佛誕假期同兩個朋友上咗東莞海逸高爾夫球會打波聯誼，開頭打得麻麻哋，後來加緊發力，當打到第五個洞時，開波位置距離洞口約一百米，肥亨大桿一揮，幸運地一桿入洞，開心到振臂歡呼！
等足十七年
肥亨好雀躍話，今次係打高球十七年來首次一桿入洞，開心之餘亦感覺好過癮，事關一桿入洞嘅機會率為十幾萬分之一。根據高球傳統，凡打出一桿入洞者都會請食飯慶祝，雖然當日肥亨只有兩個朋友做見證，但消息迅速傳遍政商界，好多朋友紛紛致電恭喜，好似作為波友嘅東海聯合集團主席黃楚標就講明要肥亨請食飯慶祝，所以肥亨已經預咗大排筵席，時間和地點仍待定。
據講前稅務局局長劉麥懿明去年底榮休時，作為前上司、前財經事務及庫務局局長肥亨都請佢到深圳觀瀾湖打高球慶祝，劉太打到第六洞時，幸運地首次一桿入洞，令在旁嘅肥亨相當羨慕；如今肥亨開齋，就唔使再恨啦！
話時話，保險係有「一桿入洞」賠償嘅，讓球手請食飯有得幫補吓，連保險公司都肯保，證明一桿入洞係幾咁難。